گوادر( گوادر سٹی نیوز)پاکستان پیپلزپارٹی صوبہ بلوچستان کے نائب صدر اعجاز بلوچ نے جمعرات کے روز ڈسٹرکٹ کونسل کیچ کے چیئرمین میر ہوتمان بلوچ سے ان کے دفتر میں ملاقات کی۔
اعجاز بلوچ نے میر ہوتمان بلوچ کو ضلع کونسل کیچ کا چیئرمین منتخب ہونے پر مبارکبادپیش کی اور خوشی کااظہارکرتے ہوئے کہاکہ آج مجھے انتہائی خوشی محسوس ہورہی ہے کہ میرہوتمان بلوچ کادفتر ایک مکمل عوامی دفتر بن چکاہے اوران کے دفتر میں پیپلزپارٹی کا پرچم لہرا رہاہے۔
میر ہوتمان بلوچ پیپلزپارٹی کی منشور اورپالیسیوں کے عین مطابق عوامی ایشوز کے حل کیلئے ہمہ وقت مصروف عمل ہیں ان کی کارکردگی روز روشن کی طرح عیاں اور عوام کے سامنے ظاہر ہے، پی پی پی کامنشور روٹی کپڑا اورمکان ہے عوام کے بنیادی ایشوز پر بھرپور توجہ دیکر میر ہوتمان بلوچ نے کم وقت میں عوام کے دلوں میں جگہ کرلیا ہے
انہوں نے امیدظاہر کی کہ میر صاحب اسی جذبہ کے ساتھ عوامی خدمت کے مشن کو جاری رکھیں گے۔
اس موقع پر اعجاز بلوچ نے ضلع کونسل کیچ کے چیئرمین میر ہوتمان بلوچ سے بارڈرمعاملات کے حوالے سے بھی تبادلہ خیال کیا اور کہاکہ بارڈر یہاں کے لوگوں کا اہم ترین ذریعہ معاش ہے، بارڈر کو بہتر انداز میں منیج کرکے یہاں کے عوام کو زیادہ سے زیادہ فائدہ پہنچایا جاسکتاہے
انہوں نے کہاکہ جس ضلع سے بارڈر منسلک ہے اسی ضلع کے گاڑیوں کو بارڈر پر آمدورفت کا موقع ملنا چاہیے تاکہ مقامی لوگ زیادہ سے زیادہ مستفید ہوسکیں۔
اس دوران مہنگائی ودیگر امورپر بھی گفتگوکی گئی، اس دوران پاکستان پیپلزپارٹی کے سنیئر رہنما احد الہٰی میروزئی بھی ان کے ہمراہ تھے جبکہ حافظ ناصر الدین زاعمرانی، درچکو کے چیئرمیں فیض اور لال بخش کھوسہ بھی موجودتھے۔