گوادر (گوادر سٹی نیوز ڈیسک ) مراد وھدیکہ پراہمری جماعتءَ وانگءَ ات بی ایس اوءِ باسک جوڈ بوت بی ایس اوءِ مدامی ایں مچی ءُ مراگشاں بہرے زرت آ وھدے کہ ھپتمی جماعتءَ اتک اسکولءِ یونٹ سکریٹری گچین بوت آئیءَ مدام مکتبیانی جیڑہ ءُ جنجالانی گیشینگءِ جُہد کت وھد وھدءِ سرا برے پہ ماسٹرانی نہ بوہگ. برے ڈاک-ر نہ بوہگ. برے پہ نادراھجاہءَ ڈاک-ر نہ بوہگ برے پہ روڈءُ بجلیءِ آسراتی نہ رسگءِ ھلاپءَ مہلوک زھرشانی پرمات انت ہندے مہلوکءَ آئیءَ را سک دوست داشت کہ مراد لائکیں نودربرے کہ مکتبیانی اڈءُ جنجالاں ابید وتی ہندے اڈءُ جنجالانی گیشینگءِ واستا جہدءُ جپا کنت. مرادءِ پتءُ مات سیادءُ وارس چہ آئیءَ وشءُ رزا ات انت کہ آ پہ بلوچ راجءُ درتہ پُچیں مہلوکءِ ھاترا جُہدءِ پڑءَ بی ایس اوءِ سنگتانی ہمراہ انت بی ایس اوءِ سروکاں ھم آئیءِ کمٹمنٹءُ بھیسہءِ سرا پہر بست کہ مراد نظریاتی سنگتے مرادءِ پت کہ دئبیءَ پوریات گرے ات اودءَ وت نہ وارت ءُ نہ پوش اتئے وتی کلیں مال ءُ متاہ لوگءَ دیم دات انت اے ہندءَ بی ایس اوءِ کارگسے ھم پچ ات بیگاہءِ وھدءَ بی ایس اوءِ دراہیں سنگت اتک انت ھمدا وتی ھیال اش درشان کت انت ادءَ ھر کسءَ وتی اڈءُ جنجال آورت انت کسے پہ چندہءُ پوڈیءَ اتک کسے پہ ہونءِ لوٹگءَ اتک ءُ ورنا ھر وڈیں کمکءَ ساڈی ات انت مرادءُ آئیءِ سنگتاں پہ مہلوکءِ ھاترا وتی جان.مالءُ زرءِ پرواہ نہ داشتگ ات پمیشکا ہندءِ گیشتر مہلوکانی ھُبءُ واہگ گوں بی ایس اوءِ ورناھاں ہمراہ ات انت کہ چہ ایشیءِ سببءَ ہندءِ میرءُ معتبر. ڈی سی ءُ کمشنر بی ایس اوءِ ورناھاں چہ مدام ھزت انت وھدیکہ گیشتر وانگءِ واستا مرادءَ کالجءَداخلہ گپت بی ایس اوءب سروکانی سرپءَ آئیءِقدءُ بالاد ودان بوت داں آ تربت زونءِ صدر گچین کنگ بوت اے وھداں گیشءَ چہ گیش مکتبی بی ایس اوءَ ھوار بوہان بوت انت پرچا کہ مکتبیاں مارات کہ بی ایس او تربت زون مرادءِ سروکیءَ سدک ءُ دل بلوچ راجءِ ھاترا جہد کنگءَ انت اگاں ھمے رنگءَ مئے جہد گام جنان بکنت مٰے منزل دور نہ بیت اے وھداں مرادءُ آئیءِ سنگتاں وڈ وڈیں سکی سگت برے آہانی ہوسٹلءِ سرا بیڑ آرگ بوت برےآ کیدءُ بند بوت انت برے شپ جاہ ءُ روچ جاہ بوت انت بلے آہاں جزم کتگ اے دانکہ ما بلوچاں وشھالیں زندے نہ
ودھیں مئے جہد ھمے رنگءَ برجاہ مانیت وھد گوزان بوت داں مرادءَ چاردہ جماعت ونت بلے چدءُ گیشتر نہ ونت پرچا کہ گیشتر وانگءِ واستا کوئٹہءُ کراچیءَ روگ لوٹتگ ات آ وتی لوگءِ پانگ پان ءُ کماش ات مرادءِ بازیں سنگتاں نوکری گپت باز ماسٹر بوت باز لیکچرار بوت بازیں سنگتاں مرادءَ را ھم منت کت کہ پہ وتءَ نوکریءِ بگر بلے آئیءَ نہ من اتءُ گشت کہ من سیاست کناًں دانکہ سیاست.مہ بیت چاگردءِ تہا دیمروٰی نئیت. وانگءَ چہ پد بی ایس اوءِ ھما ورناہاں کہ سیاست کنگ لوٹ ات. بلوچ دوست پارٹیءِ باسک جوڈ بوت انت کہ اے پارٹی کلیں بلوچستانءَ نامدار ات ڈاکٹر. ماسٹر. آفیسرءُ گیشتر وانندھانی پارٹی ھمیش ات مراد کہ بی ایس اوءِ پہتیں باسکے بوتگ ات بلوچ دوست پارٹی شریں باسکے جوڈ بوت پارٹیءِ جُہدءُ جُنزانی تہا مدام گون ات پارٹیءِ جلسہاں آٰئیءَ اسٹیج دیگ بوت آئی کمپیرنگءِ انداز سک وش ات گوں شیرکنیں بتلءَ شعراں مہلوک سک اسرمند ات انت آٰٰٰٰٰئیءَ گیشتر بشیر بیدار. جی آر ملا ءُ گل خان نصیر انقلابی شعر ونت انت بلوچ دوست پارٹی دراہیں بلوچ دمگاں زور ات میتگ میتگءَ بلوچ دوست پارٹیءِ نعرہ چاکنگ کنگ بوتگ ات انت ھمے وھداں ملکءِ تہا گچین کاریانی جار جنگ بوت پارٹی ورکرانی شپءُ روچانی جُہدءِ برکتءَ پارٹیءِ دہ باسک سوب مند بوت جہلی تبکءِ مردم گلءَ بال بوت انت کہ نوں اے چاگردءَ انقلاب اتکگ بی ایس اوءِ بازیں بے روزگاریں ورناہاں نوکری گپت مرادءَ ھم بازیں مردمے روزگار کناٰینت وتی میتگءِ اسکولءَ کالجءِ درجگ دیائینت وھد وھدءِ پہ مہلوکانی جیڑہ ءُ جنجالانی گیشینگءَ اسلام آبادءُ کوٰٰئٹہءَ شت سے سالءَ پد وھدے اسمبلی پروشگ بوت انت پدا پہ الیکشنءِ ھاترا تچ ءُ تاگ جلسہءُ مچی بندات بوت انت بلے اے رندی بلوچ دوست پارٹی سوب مند نہ بوت عوام دوست پارٹیءِ باسک سوب مند بوت انت کہ اے پارٹیءِ تہا زیات زردار سردار میر ءُ معتبر ہوار ات انت مراد وتی پارٹیءِ بے سوبیءَ چہ سک تکانسر بوت لہتیں سالاں چہ پد آئیءِ پت ھم چہ دئبیءَ پنش بوت آئیءَ چار ءُ پنچ لک آورتگ ات گوں مال ءُ مڈی ھمیش ات انت چدءُ ساری مرادءِ چپءُ چاگردءَ بازیں سنگت ءُ دوزواھے است ات چہ آئیءَ گستا بوہان بوت انت نوًں میزان میزانءَ آئیءِ پارٹیءِ بازیں سنگتاں وتی پارٹی یلہ کت ءُ عوام دوست پارٹیءَ شت انت مراد ھم مالی نگیگیانی آماچ ات ھمے وھداں بلدیاتی الیکشنءِ جار جنگ بوت مرادءِ شریں سنگتے عوام دوست پارٹیءَ شتگ ات زر گاڈی ءُ مراعات اش رسگءَ ات آئیءَ مرادءَ ھم مراعات زر من ات عوام دوست پارٹیءَ آورت ووٹءِ روچءَ مرادءَ وتی پرچی گپت گوں لرزوکیں دلے وتی ٹپہ عوام دوست پارٹیءِ نشانءِ سرا جتءُ پیتیءَ دور دات کوٹیءِ درآہگءَِ وھدءُ آٰئیءَ جیڑ ات او اڑے وھد زی من کجا اتاں مرچی کجاہاں….