گوادر میں کم سن ڈرائیوروں کی بڑھتی ہوئی تعداد، شہریوں کا پولیس سے فوری کارروائی کا مطالبہ۔ شہری
گوادر ( گوادر سٹی نیوز ) گوادر شہر میں کم سن بچوں کی جانب سے موٹر سائیکل اور گاڑیوں کی ڈرائیونگ کا رجحان خطرناک حد تک بڑھتا جا رہا ہے۔ جس پر شہریوں نے شدید تحفظات کا اظہار کرتے ہوئے اعلیٰ پولیس حکام سے فوری نوٹس لینے کی اپیل کی ہے۔ مقامی لوگوں کا کہنا ہے کہ ایسے بچے جن کی عمر ڈرائیونگ کے قانونی معیار پر پوری نہیں اُترتی نہ صرف سڑکوں پر آزادانہ گاڑیاں چلا رہے ہیں بلکہ ان کے پاس نہ تو ڈرائیونگ لائسنس موجود ہے اور نہ ہی شناختی کارڈ۔
شہریوں نے ڈی آئی جی پولیس، ایس ایس پی گوادر ضیا مندوخیل، اور ایس ایچ او سمیت ٹریفک پولیس کے افسران سے اپیل کی ہے کہ وہ فوری طور پر اس بڑھتے ہوئے مسئلے کا نوٹس لیں اور قانون کی پاسداری کو یقینی بنائیں۔ عوامی حلقوں کا کہنا ہے کہ کم عمر بچوں کی گاڑی یا موٹر سائیکل چلانا نہ صرف ان کی اپنی جان کے لیے خطرہ ہے بلکہ سڑکوں پر دوسرے لوگوں کی زندگیوں کے لیے بھی ایک سنجیدہ خطرہ بن چکا ہے۔
گزشتہ روز بھی اسی نوعیت کا ایک واقعہ پیش آیا، جس میں ایک کم سن بچے نے کرولا گاڑی کو کلٹی کیا خوش قسمتی سے جانی نقصان نہیں ہوا، مگر یہ واقعہ اس بات کا ثبوت ہے کہ اگر بروقت اقدامات نہ کیے گئے تو مستقبل میں بڑے حادثات رونما ہو سکتے ہیں۔
شہری حلقوں کا مزید کہنا ہے کہ ٹریفک پولیس کی جانب سے مؤثر اقدامات دیکھنے میں نہیں آ رہے، جبکہ یہ معاملہ روز بروز سنگین ہوتا جا رہا ہے۔ انہوں نے الزام عائد کیا کہ ٹریفک پولیس محض نمائشی کارروائیوں تک محدود ہے اور زمینی سطح پر حقیقی اقدامات نہ ہونے کے برابر ہیں۔
شہریوں نے مطالبہ کیا کہ ٹریفک پولیس کو فوری طور پر متحرک کیا جائے، چیکنگ سخت کی جائے اور کم عمر ڈرائیوروں کے خلاف قانونی کارروائی عمل میں لائی جائے۔ انہوں نے تجویز دی کہ والدین کو بھی شاملِ تفتیش کیا جائے اور ان پر یہ ذمہ داری ڈالی جائے کہ وہ نابالغ بچوں کو گاڑی یا موٹر سائیکل چلانے سے روکیں۔
پولیس اور متعلقہ اداروں کی خاموشی سے شہریوں میں بےچینی بڑھ رہی ہے۔ اگر فوری اقدامات نہ کیے گئے تو نہ صرف ٹریفک حادثات میں اضافہ ہوگا بلکہ قانون کی عملداری پر بھی سوالات اُٹھیں گے۔
شہریوں نے امید ظاہر کی ہے کہ ڈی آئی جی پولیس اور دیگر اعلیٰ حکام اس حساس معاملے پر سنجیدگی سے غور کرتے ہوئے مؤثر اقدامات کریں گے، تاکہ گوادر کی سڑکیں محفوظ بن سکیں اور کم سن بچوں کی غیر قانونی ڈرائیونگ کا سلسلہ بند ہو سکے۔