فارم 47 کے لوگ حکومتی کرسی پر بیٹھ کر بلوچ اور بلوچستان کی استحصالی نظام کو برقرار رکھے ہوئے ہیں ۔زاہد کریم ایڈووکیٹ

گوادر ( گوادر سٹی نیوز) فارم 47 کے لوگ حکومتی کرسی پر بیٹھ کر بلوچ اور بلوچستان کی استحصالی نظام کو برقرار رکھے ہوئے ہیں ۔ اسٹیبلشمنٹ کی آشیرباد سے وزراء بلوچستان کی معدنی وسائل کی لوٹ مار ، زمینوں کے قبضوں پر مصروف عمل ہوکر اپنے آقاؤں کو خوش رکھنے کے لیے تاریخی کھیل کھیل رہے ہیں ۔بلوچ فرزندوں کی جبری گمشدگی ، انھیں انھیں عقوبت خانوں اور ٹارچر سیلوں میں ڈال رہے ہیں ۔ ہماری پارٹی کوئٹہ میں لاپتہ افراد کے لواحقین کی پرامن احتجاج پر آنسو گیس شیلنگ اور ہونے والی لاٹھی چارج جس کے نتیجے میں درجنوں مرد خواتین اور بچے شدیدزخمی ہوئے کے عمل کی شدید مذمت کرتی ہے ۔ موجودہ بجٹ فارم 47 والوں نے آئی ایم ایف کی ایما پر تیار کیا جو ملک کی بدترین بجٹ ہے جسے مسترد کرتے ہیں ۔ان خیالات کا اظہار بی این پی (عوامی) گوادر کے ضلعی صدر زاھد کریم ایڈوکیٹ ، مراد بلوچ ،امین جمعہ ، نبی بخش بابر ، ماسٹر علی معیار ، محمد علی کاش و دیگر نے گوادر پریس کلب میں منعقدہ پریس کانفرنس سے خطاب کرتے ہوئے کیا انہوں نے کہا کہ فارم 47 کے لائے ہوئے بلوچستان حکومت اپنا قبلہ درست رکھیں جو لوگوں کو پُرامن احتجاج کرنے سے بھی کتراتی ہے انھوں نے گزشتہ روز کوئٹہ میں لاپتہ افراد کی بازیابی کے لیے نکالی جانے والی پُرامن احتجاجی ریلی پر آنسو گیس ، شیلنگ ، لاٹھی چارج اور پولیس گردی کی شدید مذمت کی ہے جس کے نتیجے میں درجنوں مرد ،خواتین، اور بچے شدیدزخمی ہوگئے اور درجنوں کو گرفتار کرلیا گیا ۔ انھوں نے کہا کہ بلوچستان سمیت ملک کا موجودہ بجٹ فارم 47 والوں نے آئی ایم ایف کی ایماء پر بنائی ہے جو ملک کی بدترین بجٹ ہے بلوچستان میں ایسے بہت سارے علاقے ہیں جن کی پی ڈی ایس پی میں کربوں روپے کی اسکیمات شامل کئے گئے ہیں جبکہ ایسے علاقے بھی ہیں جن میں اسکیمات زیرو ہیں ۔ انھوں نے کہا کہ بی این پی ایسے بجٹ کو عوام دشمن سمجھ کر اسے یکسر مسترد کرتی ہے اور اسے بلوچستان کی نام نہاد چند مفاد پرست وزراء ٹولہ پر نوازا گیا ہے جو فارم 47 والوں کے لیے تیار کیا گیا ہے ۔انھوں نے کہا کہ حکومت اپنا قبلہ درست رکھیں اور اپنے عوام دشمن پالیسیوں پر نظر ثانی کریں ، بلوچستان کے تمام حلقوں کو برابری کی بنیاد پر اسکیمات اور حقوق دیں انھوں نے کہا کہ بلوچستان پر ہونے والی ظلم و زیادتیاں بند کی جائیں ، اپنے پالیسیوں پر نظر ثانی کریں ورنہ بی این پی راجی راہشون فرزند بلوچستان میر حاجی اسداللہ بلوچ کی کال پر حقوق بلوچستان اور بلوچ قوم کے لیے کوئٹہ سے جیونی تک احتجاج ریکارڈ کروائے گی