ڈپٹی کمشنر حمود الرحمن کی ہدایت پر، موسمی پیشین گوئیوں کے پیش نظر ایک اہم اجلاس منعقد کیا گیا

گوادر( گوادر سٹی نیوز ) ڈپٹی کمشنر حمود الرحمن کی ہدایت پر، موسمی پیشین گوئیوں کے پیش نظر ایک اہم اجلاس منعقد کیا گیا جس میں آنے والے دنوں میں شدید بارشوں اور سیلاب کے امکانات کو مدنظر رکھتے ہوئے ضروری احتیاطی تدابیر اور اقدامات پر غور کیا گیا۔ ایڈیشنل ڈپٹی کمشنر (جنرل) تابش علی بلوچ کی صدارت میں ہونے والے اس اجلاس میں ایڈیشنل ڈپٹی کمشنر (ریونیو) سر بلند خان سمیت دیگر اہم ضلعی حکام شریک ہوئے۔

اجلاس کا مقصد ممکنہ ہنگامی صورتحال سے مؤثر طریقے سے نمٹنے کے لیے ضلعی انتظامیہ کے مختلف محکموں کو متحرک اور تیار رکھنا تھا۔ اس اجلاس میں پولیس، جی ڈی اے، گوادر پورٹ اتھارٹی، ڈسٹرکٹ ہیلتھ آفیسر، پی ڈی ایم اے مکران، بی اینڈ آر ڈپارٹمنٹ، محکمہ آبپاشی، زراعت کے انجینئرنگ ڈپارٹمنٹ، لوکل گورنمنٹ، ڈسٹرکٹ کونسل اور بلدیہ کے افسران نے شرکت کی۔

اجلاس میں جی ڈی اے اور بلدیہ کو ہدایات دی گئیں کہ وہ اپنی ہنگامی مشینری اور وسائل کو ہر ممکن طور پر تیار رکھیں اور ان کی تفصیلات ضلعی انتظامیہ کو فراہم کریں تاکہ بارش اور سیلاب کے دوران کسی بھی قسم کی مشکل پیش نہ آئے۔ خاص طور پر، گوادر کے پرانے رہائشی علاقوں میں نشیبی مقامات کی نشاندہی کی گئی ہے جہاں پانی جمع ہونے کا خدشہ ہے۔ ان مقامات پر قبل از وقت احتیاطی تدابیر اپنانے کی ہدایت کی گئی ہے تاکہ ماضی کی طرح کوئی نقصان نہ ہو۔

مزید برآں، بلدیہ کو ہدایت دی گئی ہے کہ وہ شہر بھر میں صفائی مہم شروع کریں، بند ندی نالوں کو کھولیں اور ڈی واٹرنگ مشینری کو تیار رکھیں تاکہ بارش کے دوران پانی کی روانی میں رکاوٹ نہ ہو۔ بی اینڈ آر ڈپارٹمنٹ کو بھی سڑکوں، عمارتوں اور بندات کی بروقت مرمت کرنے کی ہدایت کی گئی ہے تاکہ بارشوں کے دوران پانی کے بہاؤ میں رکاوٹ نہ آئے۔

تمام محکموں کو ہدایت دی گئی ہے کہ وہ ہنگامی صورت حال میں رہائش کے لیے دستیاب شیلٹرز اور خالی مقامات کی نشاندہی کریں تاکہ متاثرہ لوگوں کو محفوظ مقامات پر منتقل کرنے میں آسانی ہو۔ محکمہ صحت کو بھی خصوصی طور پر تیار رہنے کی ہدایت دی گئی ہے تاکہ بارشوں کے بعد ممکنہ وبائی امراض کا تدارک کیا جا سکے اور شہریوں کی صحت و سلامتی کو یقینی بنایا جا سکے۔

یہ اقدامات گوادر کے شہریوں کی حفاظت اور بارشوں سے پیدا ہونے والے ممکنہ خطرات سے بچاؤ کے لیے کیے جا رہے ہیں، تاکہ آنے والے دنوں میں کسی بھی ہنگامی صورتحال میں انتظامیہ کی تیاری مکمل ہو اور شہریوں کو بروقت مدد فراہم کی جا سکے۔