ڈپٹی کمشنر گوادر حمود الرحمن نے موسم کی سنگین پیشن گوئیوں کے پیش نظر ایک ہنگامی اجلاس طلب کیا

گوادر (گوادر سٹی نیوز ) ڈپٹی کمشنر حمود الرحمن نے موسم کی سنگین پیشن گوئیوں کے پیش نظر ایک ہنگامی اجلاس طلب کیا، جس میں ضلع کے متعلقہ محکموں کے نمائندوں اور افسران نے شرکت کی۔ اجلاس کا مقصد ممکنہ بارشوں اور سیلاب کے خطرے کو مدنظر رکھتے ہوئے ضروری حفاظتی اقدامات کا جائزہ لینا اور ہنگامی حالات سے نمٹنے کے لیے انتظامات کو حتمی شکل دینا تھا۔

اس اجلاس میں پولیس، گوادر ڈیولپمنٹ اتھارٹی (جی ڈی اے)، گوادر پورٹ اتھارٹی، محکمہ صحت، صوبائی ڈیزاسٹر مینجمنٹ اتھارٹی (پی ڈی ایم اے)، بی اینڈ آر، لوکل گورنمنٹ، بلدیہ، آبپاشی، اور دیگر متعلقہ اداروں کے نمائندوں نے شرکت کی۔ ڈپٹی کمشنر نے تمام محکموں کو ہدایات دیں کہ وہ اپنی ہنگامی مشینری، افرادی قوت، اور دستیاب وسائل کو پوری طرح سے تیار رکھیں تاکہ کسی بھی ناگہانی صورتحال میں فوری ردعمل دیا جا سکے۔

اجلاس میں جی ڈی اے اور بلدیہ کے ساتھ ساتھ دیگر محکموں کو بھی ہدایت کی گئی کہ وہ گوادر کے پرانے رہائشی علاقوں اور نشیبی مقامات کی نشاندہی کریں جہاں پانی جمع ہونے کا خطرہ ہے۔ ان مقامات پر پیشگی حفاظتی اقدامات اور ہنگامی مشینری کی تعیناتی کے احکامات بھی جاری کیے گئے تاکہ ماضی کی طرح کوئی نقصان نہ ہو۔

اجلاس میں گوادر کے مضافاتی علاقوں اور تحصیلوں کی صورتحال کا بھی جائزہ لیا گیا، جن میں جیونی، گنز، پیشکان۔ سربندر، پسنی، اور اورماڑا شامل ہیں۔ ان علاقوں میں ممکنہ سیلابی صورتحال سے نمٹنے کے لیے خصوصی انتظامات پر تبادلہ خیال کیا گیا۔

ڈپٹی کمشنر نے تمام متعلقہ اداروں پر زور دیا کہ وہ آپس میں قریبی رابطہ برقرار رکھیں اور کسی بھی ممکنہ ہنگامی حالت میں فوری طور پر اقدامات کریں تاکہ شہریوں کی جان و مال کا تحفظ یقینی بنایا جا سکے۔